المقادير
3 بصلات حجم كبير
نص كيلو قرع ( اظن كمان اسمه يقطين)
نص كيلو لحمة عجالى وله ضان زى ما تحبو (بعضمها عشان الطعم اكون اجمل)
حبتين طماطم وقرنين شطة خضرة
ملح وبهارات وتوم
الطريقة
نقطع البصل شرائح نصف دائره بنصف قطر 2سم (دا جدعة منى ساى)
نسيت الزيت قليل من زيت الطبخ اى نوع ويفضل قليل الكلسترول عشان اللحمة سمينة نخته فى الحلة لحدى ما يسخن ونكب فيه البصل ونبدا نحرك فى اتجاه عقارب الساعة عشان موضوع الطاقة وكدا
بعدين ما لونه يبقى مصفر قليلا نضيف اللحمة المقطعة كذلك الى قطعة متوسطة نقلب قليلا
ثم نضيف البهارات والملح حسب الرغبة طبعا ونقلب كذلك
ثم نصب مقدار من الماء يكفى لتغطية المكونات ونقفل الحلة بالغطاء
ونجى نديها قعدة فى النت او التلفزيون شوية او ممكن تطلعى الغسيل من النشافة المهم اخدى زمنك
بعد كدا نجى للقرع وطبعا لازم يكون مقشر ومقطع لى مربعات متوسطة الحجم
نفتح الحلة وندى المكونات القبيلة هرسة بالمفراكة عشان نتاكد انه البصل مات
بعد كدا نضيف مقدار 2 ملعقة كبير ة من الصلصة ونضيف الطماطم بعد هرسها جيدا او ممكن تقطعيها مربعات صغيرة
نكب القرع ولو الطماطم ما مخلوطة زيدى شوية موية عشان تنجض القرع ونغطى الحلة تانى
بعد ربع ساعة وقبل ما انتهى الملاح نكب التوم الدمقوق ناعم وجدع قرنيين الشطة الخضرة ونغطيها تانى
بعد نص ساعة تقريبا نفتح الحلة ونطفى النار
وخلاص الملاح جاهز بس خلى ابو العيال اجى من الشغل واقول ليك شامى ريحة الملاح من تحت